Day 1 – Nottingham 諾定咸 -> Ludlow 拉德洛
由英國中部Nottingham諾定咸出發，去Wales威爾斯Tenby屯貝一共要4小時40分中途站。因為尾兩日會住係Cardiff卡迪夫，所以首程我唔想經M42。諗咗好耐都諗唔到應該停邊，最後係搵ChatGPT叫佢建議路線。ChatGPT建議咗幾個點：Ludlow 拉德洛 / Shrewsbury 什魯斯伯里 / Hereford 赫里福德 / Ironbridge 鐵橋鎮 / Hay-on-Wye 赫伊鎮 / Chester 切斯特 / Monmouth 蒙茅斯。最後我揀咗中途站去Ludlow 拉德洛再去酒店，前後各2.5小時。
Ludlow拉德洛，係英國西米德蘭茲郡（West Midlands）一個歷史悠久小鎮，位於什羅普郡（Shropshire）。一個保留咗好多中世紀同都鐸式建築嘅小鎮。有一個大城堡 – Ludlow Castle，城堡建於11世紀，不過我地唔夠時間，所以冇入到去，只係外面參觀。城堡後有條路落山，我地去咗River Teme河邊CSONS餐廳食午餐。
River Teme橫跨英格蘭同威爾士邊界，呢間餐廳位於河邊，有好多人係到游水玩水呢！我地冇Book到枱，所以只可以買外賣係野餐枱食。但漢堡同熱狗真係好唔錯，汁醬都特別，不過就唔係咁啱我地小朋友口味。
CSONS
The Mill on the Green, Linney, Ludlow SY8 1EG
之後我地就係Ludlow鎮到行下，超多中世紀同都鐸式建築，周圍影都好靚。市中心仲有間超過三百年嘅酒店，雖然外觀好舊好似東歪西倒咁，但我Google過酒店啲相入面都好靚，好新淨。
逛來逛去，啲細路又嗌肚餓，於是我地又搵另一間餐廳坐。食埋晚飯我地又再揸2.5小時車程去到酒店，一日坐5個鐘車真係有啲攰（揸車個個覺得更攰）。明天繼續⋯⋯