Tenby 屯貝一共有三個海灘：North Beach、South Beach同Castle Beach。因為我地當日去係星期六，真係超級多人，搵咗幾個停車場都冇位，最後去到一個少遠嘅Salterns Pay and Display Car Park。但錯有錯着，原來呢個停車場11am-6pm每15分鐘有免費Shuttle Bus直達市中心，非常方便！想提提係，Tenby電話Signal收得奇差（或者係我地用Lebara問題啦，係完全收唔到），最好俾咗停車場錢後先離開。我地搞咗勁耐，最後好彩有Wi-Fi先俾到錢。
Salterns Pay and Display Car Park
Marsh Rd, Tenby SA70 8DU
我地最後揀咗去Castle Beach，小朋友非常開心。當日天氣都不錯，有大太陽，不過偶爾有風都涼。我地帶咗勁多野去沙灘玩，最後玩咗三個幾鐘先離開，反而都冇乜點係Tenby附近行街。
中間發生駭人小插曲係，家姐問我幾點，我先發現自己唔見咗隻Apple Watch。睇返啲相，一早出門口介有，但去到Tenby Beach已經冇咗。因為電話又收唔到，完全用唔到Find My，又唔知係邊唔見，都打定輸數唔會搵得返。唔見咗Apple Watch都少事，最慘係我穿係錶鏈嘅Pandora，但當時覺得都冇辦法搵到，唯有開心繼續玩。
玩到下午四點幾，真係有啲太大風，小朋友玩到流鼻水，所以決定離開沙灘。我地先搭Shuttle Bus返停車場放低玩沙嘅嘢，再搭返車去市中心，非常方便。就係返上Shuttle Bus嘅時候，我發現司機位旁邊放咗我斷咗嘅Apple Watch！！！！Amazing！！！！司機話有人執到交俾佢，真係萬分感激拾到嘅人！！雖然有一邊鏈唔見咗，但都執得返幾粒Pandora，好彩好彩！
放低野再返執Tenby繼續行，睇下手信店，行下行下就去到五點幾，諗住搵地方食飯。可惜我地太失策，星期六去Tenby又冇Book枱，搵咗幾間餐廳都冇位。最後冇係Tenby食飯，趕及尾班Shuttle Bus，返返去停車場拎車再揸返酒店附近先食。
