英國驗眼經驗 // 小朋友配眼鏡免費 // 可以係邊買Color Con？

其實到埗後都Feel到自己近視加深咗，因為平時坐車都覺得有啲濛濛地。基於差唔多要負責揸車送小朋友返學，所以就去驗一驗眼先，攞個經驗🤪，之後先再帶兩姊妹去驗眼。

我地就搵咗最近嘅眼鏡舖去驗眼，就係Specsaver。

https://www.specsavers.co.uk/

不過其實唔同嘅眼鏡舖都有相類似嘅服務，大家都可以上返佢地官網到睇睇。

直接揀”Book an eye test”就可以Book得到，就返自己時間同地點就可以，記得記得要準時呀，因為Booking都幾full，我地其中一次係因為塞車遲咗10分鐘個Booking就冇咗喇⋯⋯

成人驗眼

我地第一次去驗眼時係揀”Adult eye test and OCT scan”，除咗基本照眼（都係香港個款，望入去有個熱氣球個隻），Check眼壓同埋度數外，仲會照埋眼底嘅，如果普通Adult Eye test就係￡20，照埋眼底OCT Scan＋￡10 ，成個過程大概預1個小時左右，OCT scan視光師話大概可以每兩年照一次。

小朋友/老人家驗眼

根據NHS網頁，有一定嘅人仕係可以免費驗眼同埋有眼鏡Voucher嘅，包括：

未滿 16 歲
年滿 16 歲、17 歲或 18 歲並接受全日制教育
60歲或以上
被登記為部分失明或失明
被診斷出患有糖尿病或青光眼
年齡在 40 歲或以上，並且您的母親、父親、兄弟姐妹或孩子被診斷出患有青光眼
眼科醫生已告知您有患青光眼的風險

Ref：https://www.nhs.uk/nhs-services/opticians/free-nhs-eye-tests-and-optical-vouchers/

所以兩姊妹去驗眼都係免費咖，如果需要佩戴眼鏡嘅話，眼鏡都係NHS包埋嘅。

問咗視光師，大概4歲就可以驗眼（因為要溝通到睇到或睇唔到😂），所以細佬可以明年返學前先去驗一驗眼。除咗平時見到嘅英文字板之外，小朋友都可以揀睇圖案，唔怕小朋友唔識字答唔到。視光師都非常細心，妹妹視力一切正常，家姐就要戴眼鏡（其實前年都有戴，不過當時比較細個，驗眼過程一般，所以我地都冇叫佢日日戴）。今次做完視力測試後視光師就話要全日戴喇，大概幾日就就可以拎，都算幾快。

配眼鏡/隱形眼鏡

當時我地去Specsaver佢地好多眼鏡都做緊買一送一，不過兩副都係只可係同一個人嘅，爸爸就配咗兩副，一副平時戴一副做運動時戴，就一共£99，我地都覺得係英國配眼鏡其實都唔算話貴好多。

另外我地後來再預約幫爸爸配隱形眼鏡，都需要再次驗眼（勁細心），視光師仲勁詳細講解點樣戴同護理隱形眼鏡，最後俾咗4對Con爸爸試用。要求佢要循序漸進地加時間，第一日3小時、第二日6小時，第三日9小時，最後一副就係再去驗眼個日戴嘅。之後就可以按度數Order喇，價錢大概係￡22 – 30隻（因為有散光所以貴啲）