未黎呢到之前，我真係唔識有Nottingham呢個地方。係未視察過就正式飛過黎係呢到落腳真係好瘋狂。雖然黎到只有短短兩星期多啲，撇開未租到屋呢點之外，其實我覺得呢到都真係唔錯，冇揀錯地方！咁究竟我係點樣搵Nottingham呢個地方出黎？
點做Research邊個地方好？
（可以直接跳去後面睇我暫時住咗兩星期嘅觀感）
其實最初研究時都好罔無頭緒咖，都係上網不段睇人地分享。最初嘅時間，唔係太多香港人有寫關於英國嘅野（或者係之前我冇留意咁多），主要都係係Facebook到做Research，咁就見到《港媽 • 講英》嘅一篇Post講咗好幾個地點，就用個個做Reference去睇下邊到啱我地。
當中提及而有興趣嘅地方有Nottingham、Leeds、Birmingham、Milton Keynes，仲有已經有朋友會落腳嘅Reading。就逐個逐個地方check下生活指數、啲屋幾錢、交通點樣，又上YouTube搵下有冇片睇下咁。
《港媽 • 講英》分享嘅Which Website真係好有用！
https://www.which.co.uk/money/mortgages-and-property/first-time-buyers/buying-a-home/finding-the-best-places-to-live-akz9t5h0svcv?fbclid=IwAR1q9SbKI4cYfwpiHIksgP4eGeyhvNmTBlbduIQrnPwXaquzb2Y3VOnjhxU
另外Numbeo都係一個好有用嘅Website，可以比較下Cost of Living，心目中有個預算。可以直接比較香港同Nottingham嘅數據。
https://www.numbeo.com/cost-of-living/
咁當然唔少得人人都識用嘅Rightmove網啦！都可以Check下心儀地區嘅樓價係幾多，最初如果要租屋嘅話中概要預幾多Budget，呢個都非常重要，亦都係得我地最黎決定揀Nottingham嘅原因，就係因為啲樓比較平，相對性價比高。
而且Nottingham有兩間大學，交流生比較多，所以我覺得唔會太落後同太靜，應該會適合香港人住。
到埗兩星期，感覺如何？
交通方面：
我地都未買車亦都冇租車，暫時住係NG2市中心地段，一切都係行路或搭巴士/電車解決。老實講係比我想像中方便，雖然有Day Pass，但交通費真係比較貴（大概HKD50一日），可以嘅話我地都會儘量選擇行路，或者用盡啲個Day Pass搭遠啲周圍Explore下。
飲食方面：
自己煮當然毫無問題啦，因為有阿公嘛！XD 而且呢到啲食材真係大部分都比香港平，肉類、芝士、奶、菇類，麵包等等都好鬼平，所以自己煮嘅話真係冇問題。但當然中式食材或香港嘅檸檬茶或出前一丁會貴啲啦，但如果真係「思鄉」嘅，個價錢偶爾食下其實都係可以接受嘅。
咁出街食又如何呢？出街食嘅價錢真係比較貴，暫時除咁McDonald外，我地係未係街外食西餐嘅（McDonald算西餐啦可？😂）。外食嘅Quota我地都係留俾東南亞飲食嘅，我諗可能因為呢到多留學生嘅關係，所都有好多算擇。暫時我地試咗日式、越南河同台灣炸雞扒，亦有聽聞邊間泰國菜好食。而且相對地，我覺得都係性價比較高嘅餐廳，食碗越式牛肉河份around HKD70， 係外國黎講唔算貴（而且係好食嘅）。勢估唔到係呢到會有英國第一間許留山😅😅😅😅😅
購物方面：
比我想像中好呀，而且我覺得非常方便呀！雖然暫時只係去City Centre，除咗冇名店外，London Wesfield我有興趣行嘅商鋪呢到都有🤪。Primark、Next、H&M、Disney Store、Menkind等等等等都有，所以非常Okay！買野暫時十算其實物價同香港差不多，唔會覺得太貴。
住屋方面：
暫時住係Airbnb，所以未知實際住屋情況如何。不過其實都好Depends唔同區域，有新有舊，不過因為我地人多，一定要揀4房或以上，選擇就冇咁多了（已經冇乜學校要求，只求有地址可以做其他嘢，但暫時我哋都只係睇到3間屋）。希望可以快啲租到再同大家分享。
學校方面：
因為未租到屋，未有地址，所以都未開始返學。（不過而家疫情咁嚴重，唔返學好似安全啲）。
治安方面：
都係好睇地區，所以搵屋睇個區嘅罪案率係非常緊要。（https://www.streetcheck.co.uk）
我地上星期一就經歷咗一件小小骸人嘅事，就係係中午City Center發生Stabbing事件，好不幸地事主係死咗。我地冇目擊事發過程，只係食完野經過時見到有人瞓咗係地下，有警察進行急救。當時我地見到有小小血係事主身上，但萬萬估唔到係有人受傷，最後仲搶救不治。光天化日發生真係有啲令人擔憂呢到嘅治安，而且睇返Facebook其他人嘅評論，呢個係最近一星期內嘅第二單，所以都有小小擔心呢到嘅治安嘅。
疫情方面：
Nottingham疫情而家被定為High Risk Level 2，你問我出City Centre覺得點？都仲係好多人冇戴口罩！！！！！室內雖然有寫”Wear face covering”，但都有見到有人冇戴。室外人來人往嘅街道都好多人冇戴，或者一離開室內就塞個口罩入褸袋⋯⋯所以都係自求多福。
不過撇開唔係所有人都戴口罩呢點，商場內嘅防護都做得足嘅。單向行走，商鋪門口準備好酒精潔手液，社交距離，轉用Contactless Payment等等。不過City Centre依然係人山人海嘅，星期六日更加要排隊入鋪頭😅。
雖然只係短短兩星期好表面嘅住後感，但希望可以俾大家參考下，睇下Nottingham呢到適唔適合自己。
MainBlog：http://bymilly.co
Facebook: http://www.facebook.com/bymillyco
Instagram: http://www.instagram.com/millylo1014
Instagram: http://www.instagram.com/essentialsbymilly
Email: millylo1014@gmail.com