[35W5D] 回顧一二胎生產記

話咁快就35W5D，距離足月37週只剩低個幾星期，雖然話係第三胎，但都仲會有啲緊張🙈又想快啲卸貨，但又深深預計到卸貨後有幾地獄🙄🙄🙄🙄真係好鬼矛盾……

臨近就生，都不知不覺諗返起頭兩胎生產過程，頭一胎真係好地獄（不過相比有啲媽咪嘅全餐經歷，或者我都未算最地獄LOL），不過第二胎真係堅輕鬆😂😂😂😂😂😂，希望第三胎都可以輕輕鬆鬆鄧梓峰啦😏😏

之前都冇紀錄過，今次回顧順便記錄一下，如果唔係應該好快會唔記得😂因為生一個蠢三年⋯⋯而家第三個⋯⋯

不過真係超長文⋯⋯慎入⋯⋯

————2014 。譚心————

陀第一胎個陣仲係住緊小瀝源，所以當時登記咗沙田威爾斯醫院，因為當時屯門醫院風評麻麻🙈，所以後尾搬返屯門都冇改到醫院，依舊返沙田母嬰健康院檢查，到穿水個日都係去返沙田威爾斯😅😅😅

記得當日一早瞓醒七點幾就穿水，一落床企起身就feel到有大量水湧出，因為有research過穿水二十四小時內就要生，換好衫衝去M記食個早晨全餐（😂好彩有食），就飛的去沙田威爾斯。

雖然穿咗水，不過距離生得好似仲有啲時間☹️辦好入院手續就係等等等等等⋯⋯九點幾就已經開始Feel到有陣痛，其實都有5分鐘一次，但係護士Check咗話都係得開得1度😫唯有繼續等，但其實我已經覺得好痛好痛😢痛咗幾粒鐘之後，都！仲！係！得！一! 度！！！！！！！救命！然後護士都好好，借咗一部脈衝機俾我用，就係好似電電個啲按摩儀，宮縮個下就㩒著個機，利用脈衝去止痛，不過其實作用不太大😅。跟住幾粒鐘之後，護士Check都仲係得1度😭😭😭😭😭然後就帶去去玩fit ball⋯⋯當然⋯⋯係無乜用⋯⋯

就連中午食飯時間，都因為太痛所以冇胃口食野（好彩朝早有食早晨全餐😅），直至下午5點幾，都！仲！係！得！一! 度！！！！！！！所以決定要去催生☹️☹️☹️☹️惡夢就開始了🙊

其實入到候產房打催生嘅同時，亦都開始聞笑氣，所以當中嘅記憶都係朦朦朧朧。打催生後陣痛開始加劇，不過因為聞緊笑氣所以係極度Wing🙈⋯⋯真係好似High野咁，暈陀陀，完全唔知做緊乜。不過原來聞氣都有技巧，因為吸入笑氣到發揮效果都需要一段時間，所以唔可以痛個下先聞，而係要就痛就要開始聞😅而亦都唔可以聞太長時間，痛個下大叫護士就叫你聞氣啦，但聞得好耐個陣護士就會叫你拎開唔好聞⋯⋯但其實係混混沌沌嘅期間係好難去控制🙄

中間混混沌沌其實我都唔知過咗幾耐，然後有護士黎check度數，幾多度我就真係唔知⋯⋯只知道要再人手穿水😱然後唔知過咗幾耐，又有護士黎檢查，然後護士就suggest我打止痛針，不過佢都有提醒打咗止痛針後，BB出世後有機會會因為止痛針而唔識得呼吸，不過打返”解藥”就冇問題。我都有問護士有冇其他止痛方法，護士話有「生咗就唔痛囉」🙄🙄🙄🙄因為真係真係真係太痛太痛，都決定要打針。

打咗止痛針係真係好啲，不過都仲係痛，然後繼續聞笑氣，混混沌沌下唔知過咗幾耐，大概淩晨一點左右，終於可以推落產房！！！！！！！！！！！！！！落到產房就停晒所有止痛方法，護士就教陣痛個下用力，三四下之後，BB終於出世喇！！！！（不過都剪咗一野🙊）

好感動！但我個好感動係因為終於可以擺脫痛楚😂，因為足足痛咗19個鐘！！！！！

終於！！！譚心出世喇！

相對家姐，生澄簡直係Easy Job😂😂😂😂😂😂😂

————2016 。譚澄————

妹妹係極準時，啱啱好就係40W個日就出世喇！話說前一晚瞓到半夜就開始覺得有明顯陣痛，而且都好似幾有規律。於是我就用手機App一路紀錄住一路繼續瞓啦，雖然宮縮個下係好痛，不過中間我都有瞓著到，所以我覺得瞓得著應該即係未得，所以就繼續瞓😂😂😂😂😂

瞓到朝早6點幾，覺得都真係有規律宮縮，於是就即刻拎野出門口去屯門醫院喇。入院辦理手續後其實已經好痛，換好晒衫搞掂所有野都已經係直接入產房，上床聞笑氣。其實聞笑氣個過程都係一樣混混沌沌，然後我就聽到有護士話「嘩！依個見到頭喇」😂，停止聞笑氣，護士出去叫爸爸入黎。可惜妹妹係以迅雷不及掩耳嘅速度出世😂（其實護士有同我講如果想爸爸入到黎可以陪產就唔好Push住⋯⋯但⋯⋯點忍呀大佬😂，俾我快手解脫啦！於是乎，爸爸都未到黎，妹妹就已經俾姑娘抱走咗去磅重，爸爸入到黎只係見到生完嘅我😂。好似都差不多15分鐘後我地先再見到妹妹🙈

七點幾入院，到出世九點幾，只係兩個鐘左右就搞掂！妹妹果然係黎報恩咖！😂（不過而家已經報完😂曳到乜咁🙄）