輕鬆濟州親子遊 DAY 2 / Brick Campus 積木學園 브릭캠퍼스 / 寶健路食帝王蟹

終於打到第二日喇～第二日我地加咗酒店嘅早餐Buffet，嗯⋯⋯我覺得如果唔係Book房時包埋就都可以唔需要加😂，普普通通唔算好特別。

食完早餐我地就出發去今日重點項目 – Brick Campus 積木學園 브릭캠퍼스

브릭캠퍼스 제주 

제주특별자치도 제주시 1100로 3047 

(제주공항에서 약 20분 소요됩니다.) 

문의 064-712-1258

由我地酒店出發大概要半小時車程，車費大概係 20,000 won，基本上由我地酒店出發去觀光區都係咁上下。

去到第一樣野就係買入場劵～

我見KKday都有得賣，不過即日就冇，要買預售嘅，同埋冇分大人小朋。

如果好似我地咁Walk-in買就：

大人 15,000 Won (~HKD108)

小童 12,000 Won (~HKD87)

買完就會俾條紙手帶大家，一日未走都唔好摵呀，因為去每一個館都會有人Check咖～

雖然唔算好大地方，但都有分幾個館，有嘢睇，有嘢玩同有嘢食～

就連戶外地方都有不少用積木砌嘅野～

連花花都係積木咖～

入面有好多好多不同嘅積木作品，使用嘅其實唔止Lego一款，仲有好多其他牌子嘅積木。

有好多不同嘅藝術品，我就唔Post俾大家睇喇😂，費事去到冇驚喜啦～🙈但我覺得Brick Campus都幾值得帶小朋友去睇嘅👍🏻

連樹上面嘅橙都係積木砌😂

睇完Gallery就去另一個館 – Play

入面有3層，最底係賣

2樓係玩砌車嘅，仲有一個大斜坡俾小朋友試車😂

不過我見大部分小朋友嘅成品一Sir就散晒🙈🙈🙈🙈

我覺得3樓最好玩，因為有好多積木俾大家坐低慢慢砌，可以一家大細嘅玩。

呢啲都係我砌嘅😆

玩完砌積木後，我地又去其他館轉轉，有另一個館 – 有一幅超大嘅壁畫係用積木砌嘅！

玩完一大輪我地就去食飯喇，去試手工積木漢堡，好食！但好難用手食😂

餐廳入面亦有遊戲區俾小朋友玩，有大大舊野積木可以砌，小朋友可以砌個城堡出黎😆

食完野就要諗方法離開Brick Campus喇🙈基本上只見人揸車入黎，但唔見有的士，所以我就請買飛嘅職員幫我地Call車（好彩佢肯😭）。然後我係櫃檯見到有Shilla Duty Free新羅免稅店嘅Leaflet – Call 的士去的話會有Coupon送返🤩。因為本身都諗住去寶健路，所以就決定先去Shilla Duty Free先😆 （記得要出示Passport呀！）

有興趣嘅朋友可以睇下👇🏻

至於係賺咗定洗突咗就⋯⋯😂😂😂😂😂

就係個程的士到⋯⋯兩個小朋友就瞓咗🙈，於是去到Shilla Duty Free搵咗個位俾爸爸坐，然後媽媽就去Shopping喇～媽媽就獲得一個鐘嘅自由時間去行下喇👍🏻

不過基本上都係賣名牌，同埋好多國內人🙈，只有最頂個層比較啱我睇。

之後我地記決定去寶健路搵帝王蟹食！

其實我地都係是旦揀一間入，我地去咗一間叫「最棒 쭈이빵」嘅餐廳 。

我地去食嘅時間大概係7點左右，所以餐廳唔算多人，只有另一枱香港人。我地揀咗一個細套餐，埋單300,000won 🙈 （ ~HKD2,100) 兩大兩小食其實真係好貴🙈，但都真係抵食同好食。

細套餐係 120,000 Won per kg，我地揀咗隻2.5kg嘅蟹 （佢隻隻都係咁上下）

如果付現金或者微信支付都可以打折，但因為我兩樣都唔夠錢😂，所以碌卡就冇折喇⋯⋯

單叫蟹都可以，不過套餐有前菜同小食，會多啲野食。

前菜竟然有生蟹，好淆底，但都食咗兩舊XD

仲有送鮑魚同龍蝦～

主角黎喇！！！！！！超好食超鮮甜，但真係食蟹都飽！

最後個蟹蓋仲會拎去炒飯咖～真係超級飽！

最後我地都有留個讀俾店家👍🏻

如果想係濟州食帝王蟹嘅，不妨去呢到試試～

제주특별자치도 제주시 연동 273-18

+82-64-7458888

食飽飽我地就去行街喇～寶健路係一條商業街黎，都好多大大小小不同嘅商店，可以買下野。不過因為我地湊住兩隻小魔怪，都係走馬看花咁睇。

無諗過係濟州會見到珍煮丹😂，但大冷天邊個會飲珍珠奶茶🙈

行咗入ABC Mart望下，點知有個小朋友見到對Frozen雪靴話要試⋯⋯幾經辛苦先走得甩。

最後我都頂唔住係SPAO買咗件大褸，即刻暖晒！痛咗全日嘅頭終於舒緩到！

濟州都有幾多服飾店，係爸爸試褲嘅時候，有個小朋友試勻晒所有頭飾咁濟😂

買完野就打道回府喇～係返酒店前有一個小插曲，就係現金用晒又冇帶港幣係身，想去兌都唔得。好彩就係我之前身痕專登返大陸開電話卡同開戶口搞微信支付，而店員又好好，可以幫我兌錢，所以先有錢搭的士返歸😅真係一額汗！

半個鐘車程就返到酒店，梳洗完畢就瞓覺，聽日我地去中文圈玩～

Facebook: http://www.facebook.com/bymillyco
Instagram: http://www.instagram.com/millylo1014
Email: millylo1014@gmail.com