14日遊輪之旅 – P&O｜西班牙＋葡萄牙＋加那利群島｜Day 13-14 回程返英國喇！

終於終於回程喇！不過回程呢兩日都好大浪，所以老公又開始暈船浪。

呢兩日小朋友繼續去Kids Club，有啲空餘時間我地同小朋友係Cafe食下雪糕（另外付費）。大人都冇乜特別嘢做，都係睇Show去賭場玩下咁。P&O個賭場好細，我地學識咗玩輪盤，不過都係電電子機啫，唔夠膽賭咁大XD 最尾個晚勁好運，中咗4次！仲有Combo！不過都係成功回本啫。（都已經好好運）

船上面連14日都有一位魔術師 Magic Mickie 表演俾小朋友睇，家組同妹妹都好好彩，前後被抽中出去幫手表演。但細佬冇份，所以最後影相喊得勁傷心（但都堅持要一齊影），笑死！

最尾個日我地分到9點集合落船，前一晚6點前要放好行李係門口，工作人員會幫手拎啲行李落船，落船當日8點鐘前要離開房間。如果想早啲落船，就可以選擇7點左右自己拎埋行李落船。 我地係集合地點等到大概十點左右就可以落船喇。比較Suprise係原來唔需要再做任何入境手續，直接拎行李走得，咁究竟呢14日我有冇出境紀錄呢？

返到Southampton，又要再搭差不多5個幾鐘Coach先返到Nottingham。我覺得要去遊輪玩，最痛苦就係呢程車。

我地今次嘅14日遊輪之旅係係Costco Travel買嘅，我地Check過同直接係P&O買係一樣價錢。而係Costco Travel買仲可以有Costco Shopping Voucher，我地兩間房都有六百幾鎊Voucher咖！如果有Costco Executive會籍，都可以照計2%，應該係最抵嘅買法。

總括黎講，我覺得呢14日遊輪之旅都好玩嘅，適合我呢啲冇乜Planning嘅人，去到每一個地點就係碼頭區域遊覽下。不過唔太推薦P&O，因為設施真係比較少，短線旅遊可能冇乜問題，但14日都係同一個地方就真係有啲悶。