14日遊輪之旅 – P&O｜西班牙＋葡萄牙＋加那利群島｜Day 7 Tenerife

Tenerife係西班牙加那利群島Canary Islands中最大嘅島嶼，今日我地醒目喇，冇著褸落船。今日有一個目標行程就係去食西班牙海鮮炒飯Paella，非常之期待呀！Santa Cruz de Tenerife係Tenerife島嘅首府，同時係加那利群島兩大首府之一（另一個係Las Palmas）。

呢到市中心啲建築物有啲尖東Feel，有一個旅遊服務中心，建築物內部勁靚。旅遊服務中心有地圖派，但都係西班牙文嘅。如果有需要去洗手間，旅遊服務中心係一個好選擇。

之後我地係Google求其係附近搵咗間評分唔錯嘅餐廳，Menu上冇Paella，但我地都照叫（因為就係為咗食西班牙海鮮炒飯嘛），經理建議我地叫三人份，埋單俾個價錢嚇親，成Euro6x。不過個Paella係好食嘅，但同我地認知嘅有啲唔一樣，好似湯飯咁嘅。

食飽飯繼續走圍行，有一座TEA Tenerife Espacio de las Artes，係現代藝術與文化綜合中心。家姐係精品店買咗本西班牙文講煮日式拉麵嘅繪本（勁黑人問號😂）。佢個圖書館勁靚勁大，因為廢事嘈親人我地就冇入去參觀喇，但係上面可以望入去。

TEA Tenerife Espacio de las Artes
Av. de San Sebastián, 10, 38003 Santa Cruz de Tenerife, Spain
開放時間：
星期二至星期日：10:00 – 20:00
星期一休館

一街之隔就係Mercado Ntra. Señora de África，一個勁似黃金海岸嘅市集！市集內有超過200個攤位，提供新鮮嘅水果、蔬菜、肉類、魚類、乳製品、香料同花卉等，係當地居民日常採購嘅重要場所。我地當日兩點幾先行到去，好多鋪頭都閂咗門，淨返少量賣花賣水果嘅。

Mercado Ntra. Señora de África
Av. de San Sebastián, 51, 38003 Santa Cruz de Tenerife, Spain
開放時間
星期日：​上午7:00 至 下午2:00
星期一至星期六：​上午6:00 至 下午2:00

呢到都有好多大型百貨公司，因為帶唔夠夏天衫，所以我地跟住去咗Primark買衫，原來呢到仲有家樂福，但因為大家已經行到腳仔軟我地就冇再去睇，雖然今日可以去到晚上9:30開船，但都決定搭的士返歸抖抖。

上船，Settle好啲細路去Kids Club玩，我地就去Lobby坐下。今日遊輪安排咗Flamenco舞者上船表演，我地先可以欣賞到精彩舞蹈！