復活節倫敦遊 Day 2 - Billingsgate Fish Market / Kidzania

淩晨三點鐘起身，三點半出車，因為Billingsgate Fish Market開四點！
由我地bnb去大概二十分鐘，我地去到個陣都已經有唔少人排緊隊喇，記得要自備零錢泊車呀。

Billingsgate Fish Market
Trafalgar Way, London E14 5ST

目不暇給呀，阿公睇得最開心！😂
特別嘅海產唔算多，但我地好Suprise見到有瀨尿蝦賣，可惜好細隻。

我地最後買咗：

螄蚶 8鎊
螺 16鎊
魷魚 40鎊
木盒蠔17鎊
紙盒蠔 18鎊

買完就去Fish market入面嘅Cafe食早餐，之前睇人地分享，今次自己試 XD

不過呢份Scallop Breakfast要成￡12一份，我就覺得唔太抵，4個人￡48，好似用黎買海鮮夜晚食化算啲。

食完野離開Billingsgate Fish Market都係大概5點幾，見到都仲有好多人黎買海鮮，我地就返歸補眠喇。因為下午要帶啲細路去「扮」工呀！

邊一個發明了返工，而家仲要俾錢去返工⋯⋯講緊就係KidZania喇！我地都係第一次玩，小朋友都玩得好開心，但我覺得大人好攰囉⋯⋯

KidZania
Westfield London Shopping Centre Ariel Way, London W12 7GA
https://kidzania.co.uk

KidZania適合4-14歲嘅小朋友，如果1-3歲嘅細佬妹一齊入場，要買Early Year Ticket，可以去樓上Softplay到玩。（所有人都要有憑票入場）

我地當日玩2:30pm，每一節可以玩4小時。不過都唔係話玩咗太多工，因為都幾多次，比較熱門嘅都要排好耐先到，細佬好想玩嘅消防員，我地差不多排咗一個鐘先玩到。室內都有長櫈可以休息，亦都有餐廳、Coffee Shop，室內人多都幾焗，著薄少少可以除外套嘅裝束入場會玩得比較舒適。

我地打第一份工就係油站，如果而家啲油價就咁平就好喇XDDD 小朋友扮係油站打工，要負責洗車、入油、幫架車充電，做完就可以賺到「錢」。KidZania入面有好多唔同嘅職業俾小朋友揀，本身每個小朋友都有50 KidZos，不過唔係全部都賺錢咖，有啲齋玩冇進帳，有啲更加要倒貼去返工😂，例如：消防員、飛機師、獸醫⋯⋯

細佬勁想玩消防員，所以都唔肯去排其他野，於是乎我地排咗成個鐘先玩到⋯⋯其實5點幾個陣少人好多，可以留返最尾先玩。之前聽人講係有得著埋制服，不過因為疫苗關係就冇咗Lu，只可以戴頂帽。

之後家姐佢地仲玩咗Fashion Designer，好搞笑，係H&M黎，兩姊妹都畫得好有心機。家姐仲有玩咗Pokemon嘅精靈設計師，可以自己設計小精靈。臨尾我地見仲有時間就玩埋警察，好搞笑佢地要一路行一路大叫We are police! We are Police! 最有趣係火燭現場係有多方面嘅配合，消防員、警察同埋教護人員都會一齊出現，好有Heart！

賺到嘅錢，除咗可以拎去返第二份工之外，仲可以去買野。買野呢Part又係好搞笑，大人唔可以入去幫手，我地就睇住堆細路自己揀野，然後拎去Cashier哥哥都嘟，然後就拎走件貨，又拎第二件俾哥哥嘟😂成堆人都唔知做乜咁，係冇俾錢個個動作咖😂😂😂最後佢地就咁就離開個鋪，我地大人勁淆底佢冇俾錢就離開，好彩職員話冇問題。

最後四個鐘嘅返工生涯就完滿結束喇！我地玩到嘅職業都唔算多，如果住得近倫敦，買年票去玩應該會開心啲。

Ariel – Shell油站打工+ Pokémon設計員+消防員+ Fashion Designer + 警察
Zia – Shell油站打工+ 消防員+ Fashion Designer + 警察
Triton – Shell油站打工+ 消防員

原本仲想做護士照顧Baby，可惜個個session冇咗。不過由兩點半玩到六點，阿爸阿媽們都頂唔順了。然後仲要去臨急抱佛腳買生日禮物俾Triton。最後搞到差不多九點先返到bnb。即刻分工合作，細路先沖涼醫肚。大人再煮海鮮同開蠔，我地買咗兩盒蠔，一共有50隻，只有一隻臭咗啫。大家都好肚餓，所以都係狂風掃落葉地食XD，十點開飯，都未夠十一點半已經洗好碗添喇！

啲細路開完工都真係好攰，上床十五分鐘內就全部瞓晒！今日嘅旅程完滿結束，聽日就係最後一日係倫敦，我地會去睇大英博物館～