14日遊輪之旅 – P&O｜西班牙＋葡萄牙＋加那利群島｜Day 6 La Palma

La Palma拉帕爾馬島係西班牙Canary Islands加那利群島之一，位於大西洋，屬於西班牙，但地理位置喺非洲西岸附近，所以一樣係咁熱。

今日落船後相對冇行得咁遠就出到旅遊區，一出就係一個石灘，啲沙係黑色咖！係火山黑沙，好滑，三個係到玩沙玩咗勁耐。沙灘排球見得多，但呢到竟然有籃球框，勁搞笑，點拍波？小朋友最開心，因為可以玩沙。（佢地係到執咗幾粒石頭，但上船後唔記得咗放低，第二日就係Tenerife上返船個陣被海關人員沒收咗）

我地都係係市內周圍亂行一通，想買嘢飲唔識西班牙文真係溝通唔到。熱屎辣辣都係得熱咖啡飲，最後去咗超市買雪榚食。

呢隻木製帆船係其中一個景點 – Museo Naval del Barco de la Virgen（聖母之船海事博物館），外觀係仿照哥倫布嘅「Santa María」號建造。入場費大約係€4.5， 不過因為小朋友冇乜興趣我地就冇去參觀喇。同埋尋日行得太盡加La Palma呢到好似冇咩景點，點幾就決定回程返上船，食完晏趁少人啲去游水浸Jacuzzi。

我地一致認同Lido Deck嘅薯條係好食啲，因為係新鮮炸嘅，另外仲有熱狗、漢堡包同埋Pizza可以揀。食飽休息一陣我地就換衫去遊水。Britannia船上有4個泳池加兩個Jacuzzi，以載客量3千幾黎講，我地都覺得真係太少Jacuzzi，所以要趁埋岸啲旅客落咗船先有位浸下。

夜晚船上有大型表演魔術表演睇，都真係好精彩。船上面嘅大型表演節目由Headliners Theatre Comany負責，基本上每晚嘅Show都係個堆人。其實都真係好勁，每晚兩場勁歌熱舞，唱歌又係佢地，跳舞又係佢地，連表演魔術都係佢地！