一家七口瘋狂移英大計

其實我地準備時間不算多，由決定真係離開，買機票至到達英國只是短短一個月！諗諗下真係好瘋狂！呢篇Blog，我其實都考慮咗好耐究竟出唔出好耐，因為好似有D私人，但我希望對「想走」嘅朋友可能都有參考價值，所以都打出黎啦！

（BTW，Blog我都係決定打返口語🤪我打得順手好多XDD）

背景： 我地一家5口加公公婆婆一齊走，公公婆婆英語水平好Okay，自己出去買野都唔會有問題👍🏻。

離境順利嗎？

流程上順利，但因為班機臨時取消而被安排轉乘其他航班，所以Check-in時比較耐。但整體出境冇咩大問題。但因為大部份直航機都係好夜飛，真係最好食飽先入機場。而家少咗好多航班，好多餐廳都冇開，如果唔係就要等到上到機食飛機餐。

因為最後航班係合併咗，所以班機都好Full，亦有著晒保護衣/雨衣嘅乘客。要唔要著或寫除口罩食嘢就自己斟酌喇。

過關拎LOTR過程簡單嘛？

過程比我想像中簡單，不過之前睇人地分享話有兩條隊，拎LOTR可以排短啲個條，但我地個日只可以排長個條，一班機我地大概排咗半小時左右。見關員時，關員就表示只可以處理一個Family，所以公公婆婆同我地分開排。

我地就表明要拎「Live Outside The Rule」，咁佢就收咗我地嘅Passport，拎咗我地嘅Boarding Pass。而因為Health Delcare form我有寫會先去搵舅父，住係舅父到，佢就冇再問我其他嘢。

Health Delacare Form: https://www.gov.uk/provide-journey-contact-details-before…到埗前48小時內填，如果Submit後有資料變更需要重新再填過晒。每個大人都需要填，而小朋友資料可以跟一個大人填。.

然後佢就帶咗我地去一旁等，等待區當然大概仲有三四個家庭等緊。等咗十到二十分鐘後，佢就問我再拎舅父住址證明影印，然後就俾返吸咗LOTR印嘅passport我地喇，完全冇問我地其他嘢。.

而公公婆婆大概耐我地再多十至二十分鐘，負責佢地嘅關員問嘅資料相對就較多，亦都有睇Bank Statment。而我地係等待區等候嘅時候，我都有聽到關員有問對另一夫婦係香港做咩職業，黎到英國會做啲咩咁⋯⋯所以⋯⋯應該係我地好彩，所以咁順利！！！！

總括而言，用LOTR入境要準備啲咩？

網上資料五花八門，最緊要要睇清楚UK GOV要求（https://www.gov.uk/guidance/british-nationals-overseas-in-hong-kong）

而我地準備咗以下資料：
– BNO* （我同婆婆有，其他人揸特區護照）
– 結婚證書
– 小朋友出世紙
– 香港地址證明 （e.g. 水費單）
– 香港銀行月結單*
– 旅遊保險資料
– 英國親戚地址證明*
– 英國親戚信件 *
– Health Declare Form*
– 登機證*

只有打*的資料，關員有睇同Make Copy。

希望呢到小小嘅紀錄可以幫到大家！

MainBlog：http://bymilly.co
Facebook: http://www.facebook.com/bymillyco
Instagram: http://www.instagram.com/millylo1014
Instagram: http://www.instagram.com/essentialsbymilly
Email: millylo1014@gmail.com