親子餐廳介紹 – Applegreen – Beef & Vegetables

做FTM真係好開心咖，雖然有時真係好攰，但閒日可以帶小朋友去街都真係開心好多，唔駛同人迫🙈

（做FTM嘅好與壞真係一言難盡🤣鬼唔知唔駛返工受氣係好咩🙊但香港生活指數咁高，唔公一份婆一份真係好難維持😅所以有被動收入好緊要，不過唔係今日重點😂下次先再講）

上星期約咗中同媽咪組去食晏💖

話說今次我地揀咗去尖沙咀嘅Applegreen – Beef & Vegetables，因為上網見到有blogger介紹，有飯食又有小朋友遊樂設施，所以我地就去八卦下～

大家之前都未黎過，都係上網睇，都以為玩嘅範圍好大，不過事實有啲出入😅其實又唔算太大，只有一個遊玩設施，有滑梯同一個繩網。個遊樂設施就係係入口一出電梯嘅左手邊。

不過好似平日咁唔太多人其實都不錯，我地係星期三Lunch time去，餐廳唔係太full😆🙈都有附近白領去食飯，除咗我地好似都係得兩三枱係有帶小朋友。大概五至六個小朋友左右，玩起上黎就唔係太迫。不過個滑梯係全木，冇防滑膠，小朋友最好著返有防滑粒粒嘅襪仔就會安全啲👍🏻妹妹個日著住普通襪仔爬上去我就有啲驚驚🙈

食物方面都不錯呀，Lunch都有成十幾款可以揀，由七十幾蚊到二百蚊不等，而且惠顧主菜就可以享用埋Salad bar任食，其實都幾抵👍🏻我地都覺得可以再encore呢😆

唯一不足之處我覺得係佢想做親子餐廳，但廁所冇換片板😅就唔係太Baby Friendly，雖然可以係門口電梯個邊換，但如果可以間一個小小地方做育嬰設備就會更加好👍🏻

Applegreen – Beef & Vegetables (尖沙咀)

地址：尖沙咀彌敦道172-174號太平洋大廈2樓2A舖