Day 9 – Arrecife de Lanzarote, Spain
一早就到達西班牙Arrecife de Lanzarote，係西班牙加那利群島 Lanzarote 島嘅首府，都係島上最重要嘅港口城市。今日係唯一一日埋咗岸，我地又冇落船嘅日子。因為小朋友們都好想要游水同浸jacuzzi，所以諗住趁朝早人少啲，留係船到玩咗先。同阿公阿婆分道揚鑣，佢地一早就落船遊覽，我地就留係船到玩。
碼頭望出去好似咩都冇咁，我地遠遠咁見到有Lidl同IKEA，但唔知道行唔行到去呢？
當日天氣都非常之好，船上面只有兩個Jacuzzi，但有一個維修緊，好彩我地都搵到時間去浸一陣。浸完繼續係甲板游水、曬太陽、食嘢。甲板餐廳有熱狗、Pizza、薯條、漢堡包等等，嘢食都唔錯。
到下午settle好啲細路仔去Kids Club，諗住兩條友落船拍下拖時，點知落大雨！落船位仲要係無瓦遮頭嘅，唯有返歸去坐下。
去咗食Tea，P&O嘅嘢食我覺得普普通通。（又或者係差唔多嘅食物食14日，應該乜人都食到厭）
家姐同妹妹勁鍾意船嘅Kids Club，夜晚唔同我地一齊去餐廳食飯堅持要玩埋6pm-11pm個節。（4:45pm有Kids Tea，會食下午茶打底先）。然後玩完Kids Club再去食宵夜，不過都係因為陪佢地，我先知宵夜時段有熱朱古力飲，都好多人排隊咖！
Day 10 – Sea Day
Triton成個旅程最期待嘅日子，咁啱佢生日就係游輪到，仲要今日係Sea Day，大家可以留係船上面慶祝都唔錯，而且仲可以去Kids Club威威，所以佢都好期待。（頭個幾日都有小朋友生日，Kids Club有啲特別安排，又有小朋友一齊慶祝唱生日歌，又有禮物）所以佢瞓醒已經想直接去Kids Club玩，但因為我地方都想一家人慶祝下，我地安排咗午後先去Kids Club。（一日有三節）
我地專登帶咗啲生日裝飾上船decorate間房影相，我覺得準備得最好係買咗個紙嘅蛋糕裝飾，影相靚好多！細佬仲收到船長簽名嘅生日咭 XD。
食埋飯就去細佬心心念念嘅Kids Club，門口有貼Poster仲有禮物，細佬表示非常滿意！夜晚返到酒店房仲有一件生日蛋糕，細佬表示今次生日安排非常滿意！
Happy Birthday Triton！