回歸公司前出走澳門一天

聽日就返工喇 嗚嗚嗚

70日嘅產假眨下眼就完喇 >.< 點解時間過得咁快咖！

趁住返工前爭取最後嘅私人時間，同埋想測試下公公一打二有冇問題XD

星期四同爸爸出走澳門一天！我地係GROUPON買左船飛＋旅遊塔自助餐同觀光套票，一人都係HKD400左右，超抵！

而家可以係屯門碼頭上船真係超方便！！唯一唔好處係班次較少，有D限時限刻。

我地揀左九點幾船出發，夜晚八點返。

十點鬆D就已經到左，原本諗住去科學館睇恐龍展，但前一晚check到原來星期四休館TT_TT。於是改左plan去左大馬路個邊先，當然要去大三巴打個咭先啦XD諗住食個早餐，但因為太早，好多鋪頭都未開，不過大三巴個邊都冇咩野好食，最後我地去左食黃枝記 -_-“

醫飽個肚再兜個圈就出發去旅遊塔喇～不過原來大馬路個邊巴士改左路，冇車去旅遊塔，於是我地就搭左的士，aroundHKD25。

去到旅遊塔，第一件事搵位泵奶先！係二樓有個位有大sofa，落地玻璃，超好view！

泵完奶，hea多陣我地就上60樓食Lunch Buffet喇～今次係我地第二次係旅遊塔食自助餐，上一次都係生完臨返工前去澳門玩，不過上次有過夜今次冇。旅遊塔自助餐個賣點係旋轉餐廳！所以對D野食唔好太高期望XD 熟食其實都不錯的，不過就冇冷盤，壽司都係得卷物，但總括黎講都OK好食。

甜品都好多選擇，而且都好好味！但而家戰鬥力大不如前，食完依碟野，我有D想嘔XD

因為我地買左飛係旅遊塔戲院睇美國隊長，食完buffet仲有時間，我地先上觀景層影相。行埋玻璃影相我都好淆底，玻璃地面我直頭唔敢行上去影。＿。

行到夠鐘我地就去睇戲喇～套戲好睇好緊湊，但係⋯⋯佢個戲院竟然係大學theather設計，即係有枱個種⋯⋯坐得勁辛苦，奉勤大家唔好試 😛

睇完戲已經6點幾，離上船時間得返兩個零鐘，於是我地選擇搭的士去新濠影匯。雖然澳門好細，但搭的士都幾貴，由旅遊塔去都差不多HKD80。

冇影到出面個個8字魔天輪，求其影左個backdrop就算XD

賭場都係同其他差唔多，冇咩特別。勁cheap咁玩左百零蚊就閃人LOL

今次一日遊都幾開心，如果唔睇戲其實會多D時間行。不過因為之前都去過晒，又冇咩特別野想食，難得可以擺脫小魔怪兩公婆去睇場戲都幾開心。：D

嗚⋯⋯打到依到又醒起聽日要返工 T_T

唉⋯⋯今晚早D瞓⋯⋯吧啦