神隱嘅六月 - 我地搬村屋喇！

人生第一次住村屋

真係有啲唔慣！而且短短個半月，我已經由👩🏻‍🦰變成👩🏿‍🦰⋯⋯嗯，我覺得我比姐姐還要黑🙈

話說我地真係好誇張，搬屋當日師傅搬咗三粒幾鐘都未可以搬晒啲嘢落樓😅。然後竟然可以塞滿一架九噸貨櫃車（爭啲擺唔晒呀🙈🙈🙈🙈🙈），究竟係我地收納能力高（？）定係呢個舊屋係有第四度空間呢？黎到新屋呢到，有士多房都好似爭啲放唔晒呀⋯⋯

點解冇啦啦會搬村屋呢？

因為困擾已久嘅冷氣機問題同舊業主不歡而散啦，所以個日嬲嬲地傾完個電話就即刻去睇租盤喇。其實都冇諗過要住·村屋，始終冇樓咁方便嘛，但又想要大啲所以都膽粗粗去睇下。住咗呢到廿幾年都入過村呀，就諗住博下啦，好好彩搵到心儀嘅單位！

你問我係唔係100分，其實都唔係。不過我最鍾意佢嘅室外空間，所以我覺得其他都可以將就！而家就更加覺得室外空空間好緊要啦，至少啲細佬可以係屋企放風，有得跑下走下放下電都好嘛！

—————

1. 去阿公到唔方便🤣，應該話出入冇以前咁方便

（不過我而家都會儘量練車送去阿公到，因為第時返學都係要揸車）

2. 買餸唔方便

會多咗網購，但因為新屋唔係車停位置，有時都要行出去拎。

HKTVMall唔送貨😭，唯有幫襯誠哥。

或者有大力士係到先買 XD

3. 多蚊蟲

搬黎第一個星期真係好多蚊！後來裝好晒蚊網就好好多了！

蚊網比蚊燈有用😂，蚊拍係必要嘅，而且其實只要較啱時間出去其實就已經好好多！

係小朋友出去玩比較容易芯蚊，所以都準備咗好多不同嘅防蚊配方～

而家冇乜蚊，但好多千足蟲（？）同四腳蛇，有時突然剩出黎真係嚇一嚇！

4. 我黑咗好多👩🏿‍🦰

出入真係要帶傘，附近冇高樓大廈擋擋，真係由朝早7點去到下午5點都勁曬🙈

而家試緊晚上飲兩枝Bloom Collagen Drink睇下救唔救得返😂

5. 有兩層（我地係細屋仔）

第一個星期我真係行到腳抽筋咁濟，日行過百級樓梯😂

向好方面睇就運動量夠晒，非常適合我呢啲唔做運動嘅人🤪

總括黎講都好開心嘅，如果細佬可以自己瞓同早啲瞓到就所有野都更Perfect！XD

送一條智力題俾大家：

🤣

首先爸爸陪細佬係樓下房瞓，

然後我陪兩姐妹係佢地房瞓，

跟住我同爸爸返房瞓，

半夜家姐過黎我地房瞓，

四點幾細佬喊我就落返去陪佢瞓，

阿妹醒咗我唔係到，佢又落樓搵我一齊瞓⋯⋯

究竟最後邊個係成晚冇郁過呢？😂😂😂😂

——————————

Blog未必可以成日都寫到，不過我有Keep Update IG & Facebook報平安咖！
唔想同我失聯就要Follow我喇哈哈！