Pre-School Class

眨下眼譚心都已經返左差不多5個月Pre-school班，由一開始上2個鐘喊足1個鐘9個字到而家一去到學校就好開心衝入課室玩真係好大進步。其實我都冇諗住佢返學學啲咩知識，我只係想佢熟習下返學係咩一回事，等佢有心理準備第時返k班。真心唔同意咩<<羸在起跑線>>，起跑快真係好？講真路程中間有啲咩大家都唔知，跑得快唔一定衝線快。但咁係咪要羸在終點線？但邊個知幾時係終點先？我個人覺得唔計較得咁多。我唔奢求小朋友好叻，我只希望佢開心、懂性，就算遇到困難都可以克服。冇人知道自己幾時死，你準備得更好都可能敵唔過過天。小朋友仲有十幾年書去讀，咁早開始學識晒生字係咪真係有幫助？我反而覺得學習待人接物、禮貌、德行方面更為重要。而依啲野係要家長以身作則，就算學校老師有教，但如果家長自己冇做好榜樣小朋友可能都會有壞影響。而身教係真係最難，小朋友學壞嘅速度真係極快！一個唔覺意佢就會學左，要改正個陣就真係勁難。依個課題真係有排學，共勉之。