FALSE ALARM

上一胎都出現過FALSE ALARM，不過當時係以為穿水。

星期五個晚都發生左FALSE ALARM，好似keep住有d肚痛、有規律宮縮咁。因為第一胎係穿水先入醫院，所以其實我都唔係好sure，不過又真係好似幾分鐘就痛一次，個晚食完個飯就執野去屯門醫院檢查下。

係屯門醫院住左兩晚，第一晚入院個陣有貼胎心機mon住。其實我一路都覺得有d痛，不過醫生姑娘都話個機唔係好度到(代表宮縮強度唔太大)。度左差不多一粒鐘都冇咩野，跟住留小便同抽血就去瞓喇。之後個日其實間唔中都有d肚痛，雖然冇規律，但醫生都好好安排照一次超聲波先。超聲波結果係冇問題，咁但係唔知因咩事肚痛，醫生都建議我住多一日觀察下。到第三日就完全冇事出院喇~

雖然好似好小題大造，不過都陀左三十幾週，真係小心d好。以前成日聽人地講屯院唔好，但我今次FALSE ALARM經歷都冇咩問題。醫生姑娘都好好人，有禮貌、好專業。其實真心覺得政府醫院唔差(第一胎我係威爾斯生)，我覺得如果打算順產o既話，其實政府醫院配套都好好。有朋友生，我都鼓勵佢地去返政府，有交稅嘛 XD