超地獄濟州首爾親子遊 – DAY 3 ／明洞

食飽飽我地就check out，搭jumbo taxi返濟州機場喇～今次我地醒目喇，我地前一日就叫酒店幫我地call定，所以依程相對順利～一個鐘車程左右，我地就去到濟州機場喇～

濟州機場有個大屏幕，可以俾小朋友玩下😂一時會有魚出現，一時會有個個好出名嘅濟州公公石像，小朋友玩得不奕樂乎咖～

JeJu Air Counter

內陸機其實都冇咩特別，唯一係係你check-in行李之後，佢會叫你係到等15分鐘再返counter，睇下行李嘅安檢手續有冇問題。15分鐘後冇問題就可以去做過關手續，如果有問題就要去安檢部門到睇下係有咩問題喇🙈我地去程就要去，因為婆婆個喼有樽浴鹽😅，要同保安人員clarify咗先過到。

話咁快就飛到仁川機場，今程機不過不失啦，好彩有啲零食可以控制下兩只小鬼。落機之後我地就搭地鐵直出明洞，不過依程我地冇為意就揀咗all stop train，但其實如果揀AREX Express Train就快好多！我地回程個陣就係搭Express Train，45分鐘就由首爾站到機場。

去到首爾站就轉4號線去明洞，其實住明洞都真係好方便，不過如果有小朋友有車仔就有少少麻煩，尤其是夜晚／星期五六日真係無敵多人，要推車仔就真係有點兒狼狽，而且明洞大街都幾多熟食小販車仔，同小朋友行都要小心啲呢！

我地今次住Savoy Hotel，非常方便，就係一入明洞頭兩條街就到到。第一次去嘅時候我地係第二條街入（見到Holika Holika & Etude House就轉左），不過依個入口有幾級樓梯，唔係太方便，後來我地發現有另一個入口入，係第一條街轉左，入口就係Line Store對面，非常方便！

如果有大型行李或者BB車，強烈建議係明洞1號出口出，個邊先有升降機，如果係6號出口出係一個惡夢🙈😂不過地鐵站內其實都冇升降機，基本上要靠抬（尤其是6號出口🙈）大家最好留意返先出閘呢⋯⋯

사보이 호텔

서울 중구 명동 8 나길, 명동, 서울, 대한민국

Agoda截圖，酒店房不過不失啦，不過相對濟州就當然係好細啦😂但對於位於明洞咁方便嘅地理位置都真係不錯，而且都唔會太嘈吵👍🏻兩房兩晚大概HKD4,100 。

放低行李我地就先去醫肚，唔打唔撞去咗百濟蔘雞湯元祖 백제삼계탕😋
蔘雞湯有兩款，一款係普通雞（KRW20,000)，一款係烏雞（KRW25,000)，我地每樣都叫兩款。

熱騰騰嘅蔘雞湯黎喇😋😋😋😋😋佢地仲會停啲蔘鬚同一杯仔蔘酒落去～

對上一次係韓國飲蔘雞湯都差不多方八年前，當時去嘅係土俗村，憑印象黎比較百濟蔘雞湯味道比較淡，不過都好食，如果時間唔許可專登去排土俗村，就咁係明洞食百濟蔘雞湯都係一個不錯嘅選擇👍🏻

離開百濟之後我地就去到Artbox，一間好大間賣精品文具嘅鋪頭。

 

我地就係住係依間Line Shop對面喇～

我地見啲人係排隊去同Brown影相，不過我地唔係Line Fans，冇入去不突止，只係係門口求其影張相就算😂

之後我地就去咗掃街～（家姐同妹妹就同公公婆婆係coffe shop休息😂睇YouTube，因為如果拖住佢地應該咩都睇唔到咩都食唔到🙈）

首先食係依個肉丸，嗯⋯⋯麻麻地

然後又見到有芝士燒帶子，印象中好似KRW10,000 ，味道OK啦，但未算驚為天人，略貴🙈

另外仲有食燒龍蝦（張相唔知去咗邊🙈），KRW15,000 ，其實都幾貴，不過係幾好食嘅😋

反而依檔水果茶有驚喜，有個藍色嘅檸檬酸水幾好飲，不過之後個日想encore撞正店主行開咗，買唔到☹️

去韓國我最鍾意袋食個燒餅，甜甜又有啲果仁類東西係入面，好好味～不過應該就好肥囉，因為係油炸，仲要係浸住個種咁濟。但凍冰冰食個咁新鮮滾熱辣嘅就真係好正😋😋😋😋

食飽飽接返公公婆婆佢地😂我地就打道回酒店喇🤣