英國南部6日5夜之旅 – 第三站即日來回遊Cornwall康瓦耳

終於去到呢個旅程嘅重點喇，就係遊Cornwall！不過因為Cornwall個邊嘅住宿比較貴，所以我地最後決定係Plymouth住多一晚，即日來回Cornwall。Cornwall係英國最南部，而今次難得南下玩，就當然要去到最南端嘅「海角」啦！

首先Cornwall第一站係Newquay紐奎，然後就會去Land’s End海角，跟住去Penzance彭贊斯嘅St. Michael’s Mount，最後去埋St. Ives聖艾夫斯就回程Plymouth。

Newquay紐奎

由Plymouth出發，大概需時1.5小時去到Newquay。當日係星期二，但都係超級無敵嘅多人！我地去到沙灘附近嘅停車場都完全冇位，只係搵到停車位泊半個鐘，怱怱睇完沙灘買少少野食就離開。不過都好彩我地唔係逗留得太耐，因為後面行程都好緊湊。

係沙灘呀！！！！真真正正嘅沙灘呀！
不過當日應該都係得18，19度左右，其實得我覺得好凍🥶，完全唔明白點解可以玩水😂。不過可能如果全年計，已經係可落水嘅溫度。當日成個沙灘都係人，仲見到有唔少人係出海玩水上活動咖！

呢到都有一個水族館Blue Reef Aquarium Newquay，當日我地去個個海灘就係呢到隔離。（沙灘好似唔覺有廁所，如果需要可以借用水族館嘅洗手間）

如果要去呢到可以泊係St Georges Road Car Park (TR7 1JS) 或 Manor Road Car Park (TR7 1RA)。

Blue Reef Aquarium Newquay
Towan Promenade, Newquay TR7 1DU

https://www.bluereefaquarium.co.uk/newquay/

好搞笑呢到零零丁丁有間屋係個石到，而又得條橋連住，返黎Search先知呢到原來係酒店Aka The House In The Sea。

我地最後係Warrens Bakery到買咗Traditional Cornish Pasty做早餐，呢間話係最古老做Cornish Pasty餡餅嘅餅店，有160年歷史，而事實上呢個餡餅都真係幾好食嘅，熱辣辣又好多餡。平時我好怕呢類好黏口嘅野食，但呢個真係唔錯。（都可能因為好肚餓啦😂）

Land’s End

然後就出發去Land’s End，由Newquay出發去，大概需時1個鐘。Land’s End故名思義就係土地嘅盡頭，所以又名為「海角」。咁有「海角」，當然就有「天涯」啦。由英國的天涯去到海角，相距900英哩，「天涯」係蘇格蘭最東北面嘅John’ O Groats，「海角」則係英格蘭西南部Cornwall嘅Land’s End，如果要由Land’s End揸車到John’ O Groats要15個小時車先可以到達。希望明天夏天有機會去「天涯」睇下啦！

去到發現原來都幾旅遊區咁，有埋Family Attraction，不過我地就冇玩，但都見到有唔少家庭去玩，另外仲有一個遊樂場場份俾小朋友放電。除咗帶細路之外，都有唔少人帶狗狗一齊黎，英國真係一個好Pet Friendly嘅國家👍🏻

仲有手信店，有啲手信都幾有Land’s End特色嘅，不過大部分都唔係好靚😂。冇咩野好買，另外可以係呢到寄明信片，會有Land’s End嘅郵戳咖。

點解會係叫The First & Last House，因為如果你係到達英格蘭，佢就會係你見到嘅第一間屋。而如果你係呢到離開英格蘭，佢就會係你見到嘅最後一間屋喇。咁而家佢就係一間賣手信同小食嘅鋪頭。

我地係Land’s End等得最耐嘅就係影呢張相！差不多排咗45分鐘先影到，需要咁耐嘅其中一個原因係佢可以換字。最右下個個牌可以Show唔同嘅字，有人揀XXX’s Family，有人揀週年紀念日期，我地諗過落5201314（你懂的），不過最後都係揀From Hong Kong，而6341係代表香港同Land’s End呢到相距6341 Miles（佢有張表可以查）。攝影師影咗一張Official Picture後，大家可以自拍兩三張相自離開。而張相係冇得即場拎走嘅，你需要留低地址然後佢會直接寄去屋企。

Land’s End
Sennen, Penzance TR19 7AA

https://www.landsend-landmark.co.uk/

Land’s End應該短期內都唔再去吧，實在係太太太太遠！可惜當日天色一般，灰濛濛，不過！冇落雨其實已經好好彩，因為我早幾日睇天氣預報，個個星期都係落雨。離開Land’s End大概係5點左右，要去下一個景點St. Michael’s Mount。我地見到Land’s End有Poster 10pm有煙花，如果係住Land’s End或附近嘅，我覺得都值得睇呀！

Penzance 彭贊斯

我地下一個目的地係St. Michael’s Mount，車程大概半小時。St. Michael’s Mount係一個潮間島，潮退時可以唔需要通過橋到達島上，島上有城堡可以觀光（需要買飛入場），如果唔係潮浪時間就需要任船過去喇。不過因為我地主要係想趁潮退時行過去，所以就冇上城堡觀光，因為潮退係7pm-8pm，城堡已經閂咗。