第三胎走佬袋帶咩好？

不知不覺已經係產後12日，有啲野本身諗住產前分享，要拖到而家先有時間打。第三胎話熟手又唔係，上一次入院都己經係兩年前，其實好多野都唔係好記得，所以今胎走佬袋都係有執漏野⋯⋯哈不過都分享下今次執咗啲咩，同事實上用唔用得著啦～

1. 走佬袋一個😂

另外非常建議準媽媽預備多一個環保袋，因為入院後要換衫，咁到時就可以放好換落黎嘅便服（如果好似我咁打爆咗個走佬袋就真係有啲呢hea，啲衫唔知放邊好）

2. 健康院排版 – 因為準媽媽所有檢查紀錄都通通係晒個排版到，入院後姑娘會睇

3.準媽媽嘅身份証

4. 乾糧 – 產後補給品，我揀咗ChocoPia同KitKat，都係高熱量嘅。生完真係好攰好需要補充一下糖份，如果需要餵人奶就更加啦！

另外我都執定寧夏紅杞子汁，不過就係入院前飲嘅，為生產做好準備，補充一下。

5. 產婦用品

乳墊、M巾、網褲、床墊同束腹帶（由上至下、左至右）

乳墊同束腹帶其實就出院先用嘅，產後留院期間其實就用唔著。

我自己唔係咁鍾意產婦M巾，因為佢係就咁一塊長方形嘅墊，非常唔舒服，所以我用普通特長M巾代替。

另外有需要可以帶埋出院嘅衣物（或者家人接出院時帶黎又得）

6. BB用品

尿片同濕紙巾，同出院衣物（不過都可以家人接出院時帶黎）

公立醫院一般係產婦可以落床之後就全權交返個BB媽媽照顧（當然姑娘會幫手同手把手教你啦），所以要預備定BB嘅片片同濕紙巾去幫BB清潔呀～

7. 雜項

叉電線、Portable Charger、沖洗瓶、暖壺／水壺、紙巾、毛巾、牙刷、Skincare

（由上至下、左至右）

醫院係唔俾叉電咖，不過帶定睇下有冇機會偷雞咋，所以Portable Charger好緊要！雖然生完應該好好休息唔好玩電話，不過都會有瞓唔著嘅時間（因為生完子宮收縮其實都真係幾冤咖）

沖洗瓶呢我就冇買真係俾產婦用個種，其實求其買個吱吱豉油樽就OK，12蚊店／日本城已經買得到。

紙巾呢我今次係帶錯咗，其實帶紙盒裝厚身啲個種會比較好，因為生完下面有機會有傷口，去完洗手間沖洗過後印乾會比較好，所以紙巾不能太薄太易溶。

除咗毛巾、牙刷、Skincare外，我今次都帶漏野⋯⋯唔記得帶眼鏡！Con盒同紮頭髮橡筋，後尾要叫老公拎黎。

8. 精油

作為一個用油人，當然唔少得精油啦。不過因為我係直入產房，所以精油係用唔著，因為入去之前成個行李要鎖入櫃⋯⋯不過都介紹一下有啲咩可以用，如果入院後未生得，都可以用油幫下手。

最想介紹係上面個幾樣！因為真係好有用！

Rose Ointment 玫瑰軟膏，人奶媽可以用黎搽乳頭，亦可以當BB PatPat膏，依個產後一兩日都未必用得著，不過有備無患。之前都有分享過用Rose Ointment改善妹妹嘅皮膚，個陣佢好似有口水癬咁，面仔一忽忽紅又甩皮，不過搽咗一排Rose Ointment就靚晒喇～

Thieves Waterless Hand Purifier 盗賊 (Thieves) 潔淨護手液，依個又係十分推介！平時有小朋友出街都好有用，而且冇有害物質，rub完小朋友食手都唔怕。產後有時唔方便落床都可以清潔雙手，親朋戚友黎探BB都要先清潔雙手先抱啊！

然後要介紹嘅係一枝自己溝嘅按摩油，係為產後按子宮而設嘅。餵母乳其實都可以刺激子宮收縮，幫助子宮快啲回復原來大小。另外搓肚亦都可以，所以姑娘都會不斷建議產婦多啲搓肚咖，而配合埋精油就事半功倍喇！

我用嘅5% Lavender 薰衣草、Geranium 天竺葵、Jasmine 茉莉

Lavender 薰衣草可以舒緩產後嘅不適，而Geranium 天竺葵同Jasmine 茉莉就可以幫助子宮收縮，而且香味相當宜人，都可以幫助媽媽放鬆咖。（不過記得要揀最高品質嘅精油呀）

最後想介紹嘅就係ClaraDerm護理噴霧！上一胎生個陣產前已開始用，唔駛剪，只係損左少少縫左一針啫。今次當然照版煮碗啦，咁結果都係唔駛剪，只需要縫少少啫！！！產後每次去完洗手間，沖洗乾淨後我都有再噴，傷口埋得不錯，而且可以唔需要食止痛藥，ClaraDerm功不可沒呀！

大概走佬袋就執依堆野就夠喇。如果係公立醫院生，第二胎順產的話，如果冇特別問題，24小時就出院咖喇，所以其實都唔駛帶太多野去，有需要叫屋企人拎都OK。遲啲再寫可以用咩油，同第三胎產子記，由穿水都生出黎都5個鐘左右，再一次飆風產子 XD