臨出發前一星期先醒起，未申請 UK Global Health Insurance Card（GHIC） ！！
本身BNO Visa都合資格申請，但因為之前五年都冇乜歐遊，到舊年遊輪之旅又唔記得咗。到記得又差唔多搞ILR。拖拖下就唔記得咗，好彩出發前一星期醒起，批得切又趕得切收到！
我22/7申請，23/7補交Share Code資料，即日就收到Email成功，28/7就收到實體咭，英國真係好少咁有效率
GHIC係咩？有咩用途？
GHIC 係英國居民去部分海外地區旅行時，可以用黎享有當地公營醫療系統提供嘅、醫療上有需要嘅治療。
例如去歐洲旅行期間突然病咗、需要睇醫生或者去公立醫院，GHIC 可以令你按照當地居民適用嘅條件接受相關嘅 state healthcare。
一般可以喺：
EU 國家
Switzerland
Norway
Iceland
Liechtenstein
以及部分其他適用地區使用。實際出發前最好逐個國家 check 清楚。
申請方法好簡單，而且係免費咖！
合法居住英國並符合資格，就可以經 NHS Business Services Authority 官方網站申請。
GHIC 通常有效期為5 年，伴侶及小朋友，符合資格嘅話亦可以作為 dependant 一齊申請。
咁有 GHIC，仲需唔需要買 Travel Insurance？
需要，因為 GHIC ≠ Travel Insurance。
GHIC 主要係幫你處理符合資格嘅 state healthcare，但佢唔會包晒旅行期間可能發生嘅其他費用。
例如：
醫療需要你返英國嘅 repatriation
私家醫院／私人診所
某些醫療費用及額外收費
因為生病而需要延長住宿 改機票、取消行程等
部分活動相關嘅救援費用
咁點解有 Travel Insurance仲需要 GHIC？
如果只有Travel Insurance而冇GHIC，如果旅行期間病咗／受傷，你仍然可以按照 Travel Insurance 保單條款獲得保障。但去到當地醫院，未必可以直接當作當地居民咁使用公營醫療。有機會需要先支付醫療費，再向保險公司索償（實際做法視乎保單）。如果當地有部分醫療費用本身要由病人支付，旅遊保險未必全部包，要睇 excess、保障上限及條款。
咁係申請GHIC係免費嘅前提下，當然有雙重保障係最好啦！