飆風產子記（第三胎）

今次生細佬應該都算飆風產子，不過就算第三胎都唔輕鬆（其實應該生仔都唔會好輕鬆XD）。由入院到細佬出世，都只係4個鐘左右，都真係好快！細佬同二姐姐一樣，都係好準時，係正40W出世😂

記得當日仲諗緊細佬係咪想逾期居留，就係當日傍晚就突然穿水。第一胎都係穿水先，不過就係朝早起身落床個下穿水，今次係係公公屋企樓下等等下𨋢穿水，真係勁突然，仲要係大量個隻，好彩本身有墊M巾，如果唔係都好狼狽🙈。最好笑係我原本約咗個朋友交收BB衫，原先係約咗係市中心交收，不過因為我有啲唔舒服，所以朋友好好拎到去我屋企樓下，如果唔係咁我就係市中心穿水喇😂

放低啲衫去公公屋企後九秒九就衝返屋企換衫入醫院。唔知當日咩事，等咗勁耐先有的士，差不多係30分鐘後先去到醫院。去到屯門醫院檢查完就已經直入產房，不過當時都未開始痛，只係再有水流出黎咁解。唔知今次係咪因為冇咩人係依個時段生仔😂，姑娘唔忙，做完檢查姑娘就已經問想唔想叫先生入黎。所以爸爸今次好早就入咗黎陪產（第一次都有陪，但第二次趕唔切入黎妹妹就已經咇咗出黎），爸爸話印象中好似上一胎都係依間房依張床XD。大概係爸爸入黎30分鐘後開始有少少陣痛，今次姑娘好好（又可能因為比較得閒），於是佢教爸爸幫我按摩👍🏻佢俾咗（好似係）太陽花籽油我地，媽媽打側身訓，然後爸爸就係陣痛個個moment幫媽媽按腰背。說實話其實就唔係太止痛（笑），不過感覺會比較良好啫，叫做爸爸有啲野做，我諗如果可以加Valor／PanAway會好好多😂。

玩完一陣按摩之後，姑娘又問我玩唔玩Fitball。第一胎個度數開唔到嘅時間都有玩過，今次見冇咩做又未生得又再試下啦。係Un嘅過程中陣痛係有加劇嘅，去到大概3分鐘一之嘅時候，醫生黎到咁我就上返床喇⋯⋯然後惡夢就開始喇LOL，因為醫生話要落催生藥😢

落催生藥即係加快子宮收縮以加快產程，好嘅係快快趣生完收工，唔好嘅係真係好鬼痛！（不過邊有生仔唔痛咖⋯⋯咁快手搞掂都係好事嘅🙈落催生藥之後我都開始聞笑氣喇，所以⋯⋯中間⋯⋯嘅事⋯⋯我唔係好記得😂，只知道好痛同不斷大叫，就朦朦朧朧之間就生咗喇！哈哈！臨生到個個𣊬間聽到姑娘叫唔好用力因為臍帶纏頸，其實都好好彩個下聽到，如果唔係我諗我都會繼續大力push🙈而且今次都好好彩唔駛剪，只係爆少少，都係縫少少就冇事。

睇一睇鐘剛剛好都仲係40W個日出世，細佬仔冇遲到，乖仔！👍🏻😂

Welcome to the world, Triton!